A herliam ve ta; thawm dim te-in...

"Comrade hlui... zalenna zawnga kan vahvaihna khua a sei lua e..." Hnam movement-a theihtawp a chhuahpui thrin Malsawma Colney, MNF president hlui chu ka pu chuan a ruang chunga thusawi turin a lo tihlawk a ni a, a sawilawk ang ngeiin thu a sawi ta a ni.
===============================================


Sikul ka kai tir mai a la ni a, ka puin thu tam tak min hrilhte chu a chang chuan man thiam har ka ti fo thrin. Tlai khat phei chu kan khum mawngah hian Israel fate'n Pathian thu an awih loh avanga thlalera an vahvaihna kawng hi a lo tar vang mai a, chu chu kan pahnih chuan zan tam tak chhung chu kan thil zir a ni, awlsam tea an tum ram thleng mai tur kawng an han bo nasat zia mai khah... khalaia kha ka pu chuan a tuipui ber niin tunhnu hian ka hre thrin.

Tu hmuh hmasak ber mipa lo ni bawk nen, ka pu nen hian a kipa kawiin kan inzui a, Chaltlangah kan pahnihin kan awm dun reng a, sikul kai tirh lai a ni nghe nghe. Heng hmun atranga khawchhak Triu lui hnaih tak tak thlenga ram hnuaia riaka hun kan hman kha a tam hle, ani chu 'ramhnuai mi' a ni a, naupang te si kha luipui kamah khan riak dunin a duh duh hunah ramngaw karah min kalsan fo a, thin phu a lian ve fo. Khang hunte ka thlirkir ka thlirkir tawh mai dawn nite hian ka hre thrin.

Col. Vanthanga hi hnam movement kal nat lai hre phakte leh Laldenga dodalna chungchang lo tuipuite mi tlemte chauhin an hre tawhin ka ring. Kum 1920 khan Biate-ah a lo piang a, unau pariat niin hmeichhia pakhat an nei, an hunga buh an thar hnema chhungkaw ziding leh hausa an tling ve thrin an ti. Kum 1943 khan kum 23 mi niin Assam Regiment-ah a trang a, Havilder a ni hman a, 2nd Batallion Shillong-a an hel truma ata ei duh loh avanga India sipai atranga ban zingah khan a tel a ni.

Khatia sipai zinga ban a nih hnu kum 1966 khan ram a buai chho ta mai si a, rilru lo hel sa bawk nen MNF movement chu zawm nghalin Eastern Command-ah Asst Commander nihnate a chelh chho a, Champhai runte kha Eastern Command chuan hlawhtling takin an kalpui a ni.

Ram a buai zel a, Bangladesh lama hnam sipai an tlakthlak khan Colonel nihna an pe a, rinawm tana ram leh hnam tana beiin UT Command-ah Commander-in dah a ni a, Chief of Army Staff dinhmunte pawh a chelh hman nghe nghe.

Kum 1970s khan Pu Laldenga leh India an inbiak chhoh lai khan Col. Vanthanga hi UT Commander in a awm a, hnam sipaite tawrh laia president ber khawsak dan chu duh lovin hnam sipai senior officer kokhawmin Laldenga rin lohna lam thu an titlu ta a, kum 1978 khan Laldenga chuan Col Vanthanga chu a rawn tawng tak avangin ani pawhin Open Letter sei tak thawnin MNF president bera chu UT Commander leh hnam sipai senior officer chuan mipui hriatah a bei ta a ni.

Hemi hnu hian Col Vanthanga chu hnam tana thrahnem ngai taka beitu midangte ang thovin Laldenga chuan a 'ban' ta a ni. A vanglai hun zawng zawng hnam tana a lo inhmanral hnuin ka pu nen chuan he khawvelah hian kan intawng ta a, a titi tui ber pakhat chu 'an rammut lai leh a tupa' tiin an sawi thrin a.

Khatia MNF president berin a mi leh sate tawrhna hre lova nuamsa taka India thlazar hnuaia a awm reng avang khan ka pu chuan Laldenga kha a dem a, hnam sipai thite leh nunna chante thisen chu atan chuan thinrimna a tling reng a, Laldenga'n inbiakna a kalpuiaa inkahhai a nih chhung hian ka pu chuan hnam sipai 11 lai India sipai lakah an thi tih a tarlang a, 300 chuangin hliam an tuar tihte a lo ziaklang a ni.

Ka ngaihtuah let leh a, khatia a vanglai hunte a hman zawha kan intawn hnu khan Israel fate zinkawng kha a tuipui em em a, Apokrifa te kan chhiar nasa thei hle. Hnam movement kalpui dan kha Laldenga khan a tawp lamah khan a kalpui dik ta lo a ti ni hian ka hre thrin a, chuvang chuan Zo hnam zalenna kawng chu thui tak a lo ni ta niin ka pu khan a suangtuah thrin nite hian ka ngai a ni.

Ka naupan tet lai atrangin ka pu nen hian kan inkawm nasa em em a, ram palailengah pawh zan tam kan riak dun thrin a, thang kan kam a, thawnthu min hrilh a, kein hmun hla tak takahte kan zin dun thrin. A titi tam takah hnam movement an kalpui lai min hrilh thrin a, mahse ka hrethiam pha hlawl lo tih hi ka pha lo, chutiang thawnthu mak tak tak chu a ke bulah chuan ka inchawm seilenna a ni. Mahse kum a upa ve zel a, ka man ve tial tial a, ka man tak tak hnuin ani chu thisen sang avangin a trawng a fiah thei ta lo a, engmah kan inzawt chhuak ta lo thung, mahse sulhnu a lo nei nual maia zawnkhawm chu ka tih tur a ni ta hmel.

Bomb leh bomb loha Zopa inhnial hi a zahthlak

Kum 44 chauh a ni la liam ni... India sawrkarin Mizo Hills kha Air Force meuha a beihna kha. Kum 40 chuang a liam hnuah tunlai hian sawrkar laipui chuan thlawhna hman tur a nih leh nih loh hi mi tam tak inhnialna a ni. Maoist-te chuan India ram hmun zaa 40 velah thawm an nei mek a, sawrkar laipuiin a ngaimawh, ngaihdan hrang hrang an la a, thlawhna hmanga beih mai tha ti an awm, mahse Mizo Hills an lo beih tawhna an rawn thlir let a, thlawhnaa bomb hmanga inbeih meuh chu mahni mi leh sate chungah thleng tawh suh se ti pawl an awm a, heng mite hian thawm pawh an nei lian hle.

Keini ramah ve hian leh, kan khawpui Aizawl ngei mai India Air force thlawhna hunter leh toofani-in a rawn bei hmu ngei ngeitute khan 'min bomb hleinem...' tiin sawi mam kan tum ta tlat mai hi a ni mak ni. Tute emaw hming a chhiat hlauh vanga mahni ram leh hnam history a dik loa sawi tum tlat hi Zopa zingah hian kan awm thei dawn tihna a ni awm ta em! Aizawl chauh ni lo, Mizo Hills hmun 8 lai chu India Air Force khan a bei a nih kha.

Khatiang em ema mahni khua leh tuia an chhalte an bei ta mai kha tun hnu hian mithiam leh ngaihtuahna hmangte chuan awm lo an ti a, Maoist chungah pawh hian thleng lo se an duh ta hial zawk a, chu chu Mizoram dinhmun atanga inzirna tur niin an ngai.

India khan Armed Forces Special Powers Act kha Mizo Hills-ah a puang a nih si chuan ngatinge Air Force hmanga a rawn thawhchhuah tak mai le? Armed Forces chuan min lo bei, Mizopa pawhin an lo bei, leia indona a ni, mahse van indona kha a thu puan bawhchhia khan a rawn hmang a, hei hi ngaihtuah chian hian rapthlak tak chu a tling a ni.

Mizoram bomb ang chu Maoist chungah thleng suh se... tia hrawk phiar tawng tawnga au an awm tawh laia a Zopa berin "min bomb lo" lo tih hi eng ngaihtuahna atanga rawn chhuak nge ni ta ang le... Mahni hnam tawrhna theihnghilhtute hi thangtharte hian enganginnge an ngaih dawn che u aw ka ti. A rei tual tual anga kan hnam dikna leh chanvo humhalh turin hnam history leh hnam movement lo awm tawhte hi thangtharte hian an la tuipui dawn chauh asin.

Thlirna changkang tak tak hi

"Sawrkar hian lo hal khap rawh se..." tih rilru pu tawkte kan awm tan leh ta niin a lang. Tun lai kan thlirna tam ber hi 19th Century vela Europe-hovin fing ber emaw an in tih laia Euro-centric lam hawi zawnga thil an thlir vek hi a ang tih chang ka nei thin. Aizawl atangin pen kan hum a, Zoram kan thlir kan ti a, chu chuan mipui huapzo lam aiin khawvel ram fing zawkte thu leh hla tuipuinaah min kailut nite hian ka hre thin.

Thing leh mau vawnhim, environmental issue etc. te hi Mizote hian kan sawi ve pha meuh emaw'n chu le ka ti. Khawvel ram changkangin hmasawn an tum luatah boruak an tibawlhhlawh zo a, tun hnuah an inhmuchhuak a, 'global warming' tih te 'air pollution' tihte an rawn au pui a, zirlaibu atante an rawn tilar a, chung an khawih chhiat boruak siamthaa veng tur hian keini ram hnufual (indigenous people)-te hnenah an thufing bu chu min chhiartir leh daih thung.

Kan zirlaibua environment lam an rawn uar tharte hi a tichhe tam bertute rawn tih tho tho a ni thin, keini tan hetiang issue hi sawi pawh a la ngai hleinem, keini tan chuan economy-a than hi boruak tihchhiat aiin kan 'survival' pawimawh zawk a la ni asin.

Tun hnaiah Copenhagen-ah climate chungchangah summit a awm, kha intawhkhawm kha i thlirlet chuan boruak tichhe nasa ber bertu, mahse boruak tihchhiat titlem tha duh lo deuh deuhte chu ram hausa pui pui, hnam hnufual leh hre tlem zawkte laka environment chungchang min zirtir vak vaktute an nih hlawm kha.

"Keini hian boruak hi kan tichhe zel ang a, nangni'n a venhim lam in lo kalpui ang a, keini kan hausa ang a, nangniin hausak lam in ngaihtuah ve hman lo ang a, nakinah chuan kan thuhnuaiah in awm tho tho dawn nia," tiin kan hmaah an rawn tawkdarh ni hian a lang.

Thlawhna tum hmun kan nei a, Mizo zinga zaa 30 tling lo chuan an chhawr viau mai thei, mahse zaa 70 vel innghahna chu kum tin lo neih a la ni. Kan thlawhna tum turte chu lo hal khuin a tibuai thin, hei hi a zahthlak a nih chuan kan zahna lai tura zawk chu kan ram 'economy' insawh fel lo laia hi a ni. Ram hruaitu thenkhat chuan thlawhna tum thei loa kha an zak a, hnam dang an tum theih loh ten hrehawm an ti.

Zak theuh theuh zahna lai chu a inang lo a ni e! A zahthlaka chu ram mipui tam zawkin buh thar nana primitive ber an la kalpui loh theih loh laia mi hausate thlawhna, grand vitara etc. vela an tlenga an thlawk reng mai si hi a ni.

Thingtlang mipui thleng phak hmalakna ni tura beisei NLUP lah chu sawrkar kum khat a liam ta, khawiah tuan tak che maw NLUP? Sawrkar kum hmasaah khan budget-ah crore 100 ear marked a ni tih a ni a, khangte kha an hnukkir ta nge, hei March ni 31-ah sawrkar kum a tawp dawn ta mai si a.

NLUP a thlawn mai maw? kan ti ang tih a hlauhawm, kuthnathawktute an rum tan... khawnge sawrkar? Khawnge intih changkanna chu?

I lo thlir leh phawt mai ang.

Tlemte duh dan dan

Mahni duh chin tawk tawkin vangtlang ram leh kawngpui kan nek a, sawrkar building kan sak lahin nakin lawkah a la chep ange tia ngaihtuahna senga lirthei hunna tur thawl \ha helhawl siam kan tum lo a, kan in sakte a lian thei ang berin kan sa a, mihring khawsakhona atana chenna in ang hiala pawimawh kawngpui erawh a chep thei ang berin kan nek thung. A tam zawkin kawng anah in sak kan tum a, lirthei hunna tur zuah hlek lovin in kan sa a, duh ang tawka kawng hnaiha in kan sak hnuah vantlang kawngah lirthei kan la hung bawk.

Tlang panga cheng kan nih miau avangin kan khawpui a \hang zel a, kan lo chep ta tual tual a, sawrkar lamin lirthei hunna ngaihtuah nachang a hre lo mai ni lovin a ngaihtuah hlawl si lo. Nitin lirthei thar a pung zel a, tun hnai lawka City tih hming kan puttir Aizawl khawpui chhung chu India rama khawpui tawt berte zingah a chhiar theih ta mek a ni.

Chutiang taka khawpui tawtah chuan lirtheih neihte khap theih ngawt a ni bik si loh avangin mihring khawsak a changkang zel a, kawngpui zauh ve theih tawh si loha tlan tur lirthei pung thur thur chuan khawpui nun a khawih buai zo ta a, kea minute 10 kal pawh tlinglo kha motor-a kal chuan darkar changve chuangte thang a lo ngai ta a, chutia khawpui nun a khaihlak chhoh takah chuan 'lirthei hunna mumal tak siam ila, pisa kai hun laia kawngsira hungte hi dah bo vek ila, dan zawm duh lote chungah khauh takin 'action' lak se,' tia ngaihtuaha a taka kalpui theihna hun tur a liam zel a.

A diltu an tam si a, a diltuten vote zawng politician an nek nat fu si avangin taxi permit chu mi tam takin an lo nei ta a, taxi neitu an lo pung zel a, khawpui titawt bertuah ngaih an ni ta hial.
Sawrkar thuneituten khawpui tih thawlna tur a rang a ranga ngaihtuah a ngaih laiin an ngaihtuah lo a, parking hmun lian tham siam aiin shopping mall leh khawpui tawt laia auditorium tih lente an ngaihtuah ta deuh deuh a, mipui tih lawm nan taxi leina tur pawisa nei pha ngatte hnenah taxi permit an thei sem a, chuti chuan khawpui chu a lo tawt ta a, tihthawl a ngai a nih hi tiin ngaihtuahna an han seng ta a, chutah chuan a thiltitheite chuan 'keini hi a ni mawhphurtu' an ti leh ta der lo. A thawm nei na lo thei ber tur, a dinhmun chhe ber, pawimawhna nei nep ber, zuamawm ber chu a tuartu tura rel thluk a ni leh ta hleuh a ni.

Hei hi a ni capitalist society ziarang dik tak chu, hei hi a ni Karl Marx-an a thiltithei leh hausa tlemte te thuneihna society a lo tih ngei chu. Taxi permit duh zat zat pekchhuaha mawhphurtu ni lo, khawpui tawt tihthawlna tura parking hmun \ha ngaihtuaha roreltu dinhmuna ding phak ni lo, kawngpui nekchep pha pawh ni lo, mite in luaha khawsa naw nawa harsa taka professional driving license nei vea chhungkaw hrawk chawmna atan taxi a khalh theih tih hriaa mi taxi khalhtu chu a ni tuar tura kan tih hmasak ber tak zela chu ni!

Kan society hian vei \ha lo tak a vei \an mek a, chumi lakah chuan mirethei leh thilti ve thei lo, chhungte nei \ha ve lote an him lo \an mek. A hausa leh thil tithei tlemte duh dan danin kan khawsa mek a, chutiang society-ah chuan hnawk tak taka an lirthei mawi tak tak kawngsira hungtute kan hau ngam ta lo a, a thlang lawka mahni tharchhuah thlai hnah lo \hutpui vetu rethei leh bakberh takte chu kan um darh chum chum a, Mizoram kawngpui hmun hrang hrang a chhiat em avangin kan sawisel cham chi a, mahse mi hausa leh tlem te thil titheite zinna kawtkai Lengpui airport road chu kum tluanin a hnum hlurh a, thingtlangpain Lengpuia thlawhna thlawkchhuak ena 'excursion' a kal laiin society-a hausa leh thiltithei mi tlem zawkte chuan thlawhna chuan leh punkhawmnaa theitui sem chu a ve rengah an ngai tawh. Lo hal hun laia thlawhna a \um theih lohte phei chuan, 'a zahthlak lutuk,' an ti daih a, a zahthlak laia Mizo mipui zaa 60 vel innghahna kalsan theih lo, mangang taka lo la neih ngai laia ai chuan mipui zaa 20 vel chauhin an chhawr tur tih khaihlak chu zahthlakah an lo ngai ta.

"Khawpui tihthawl nan chhungkaw pakhat lirthei pakhat aia tam nei chuan an lirthei intlanchhawktir rawh se," tiin ro kan rel tak tak hauh lovang, "sawrkar hnathawkte hi kein kal rawh se," pawh kan ti ngai lovang, kea an kal pawhin an hna chu an chan dawn hauh lo, "a zuamawmte zu chauh hi i man tawh lo vang u," kan ti ngai hek lo, engvangin? Private lirthei pakhat aia tam nei chu society-ah mi thiltithei a ni ngei ang, sawrkar hnathawk chu kan society-a thuneitu an ni deuh zel bawk ang (hnatlang kan tih pawhin a security nei \ha ber, sawrkar chawlh kan tinzawn, sawrkar hnathawkte hi Mizo mipui zaa pasarih pawh an tling lo). Zu kawl rei rui leh a \ha \ha chahluttute chu kan society-a thiltithei ber ber, dinhmun pawimawh ber ber chelhtu an ni, anni chu thah thiang lo bawngpa ang hlauh an ni, kan khawih ngam tawkte chu a hnu leh awm ve vak lo, dinhmun bul deuh tak takte chauh. Miretheite VIP an nih dawn chuan a taka ngaihtuah a ngai, khawvel society tam tak kal tawhah Karl Marx-a ngaihdan a thleng dik vek lo, miretheite zawkte hmun khata inhlawmkhawma tharum thawhna a thlen a \ul kher lo ang, hei hi 'insiamrem theih' an tiha chu a ni. Sawrkar hian a thuneihna lian tak neihte hi miretheite dimdawi thei ang berin a lekkawh a, a hausa zawkte nuai a ngaihna lai a awm pawhin huaisen taka a kalpui a ngaih hun lai tak a ni. Mizo mipui hruaituten ngaihtuahna fim an hman a ngaih hun kan thleng mek.

Hmasawnna lo amen duak duak

Hmanni chu ka ngaihtuah mai mai a, Mizote hian a hminga hmasawnna tel tawh phawt mai hi chu kan amen duak duak ni mai hian ka hre thrin. Tui khuah (dam) siamte hi kan duh em em mai zel a, power siamna hmanrua tiin kan sawi mawm viau zel a, mahse a takah hian inchinfel hmasakna tur hi kan ngah viau hian ka hre ve tlat mai.

Tunah hian kawlphetha kan lakluhna leh kan pekchhuah lehna ringawta kan hloh zat hi za 40 dawn a tling a, Aizawl chhehvel hnai mai Phunchawngahte khuan hmanni chu thriante huan kal pahin ka zawt hlawm a, "Rs 50 fixed in kan pe," tiin kawlphetha an chhit dan chawhrual dan min hrilh, TV an nei deuh zel a, refrigerator an nei bawk, thla khatah cheng 50 man chauh chu an chhi hlawm dawn lo tih chu ka hmu reng mai. Hetah hian a management kan ngaihthah tih hi chiang takin a lang.

Kawlphetha management te hi tlemin han kalpui deuh ta ni ila chuan kan pekchhuah leh dawnna kawnga kan hloh tam tak hi kan hloh loh phah ngei ang, August ni 6 khan zan dar 8-ah kawlphetha Mizoramin kan dawng hnem ber a, chu chu megawatt 48 leh tlem a ni, hei hi kan dawn tam loh ni chu a ni ngei mai, hetah hian kan lakluh atranga zaa 40 daih kan hloh a rinawm, megawatt 5-10 te hi kan hloh thei mai ang em? Chutih laia Builum angahte thal laia megawatt 3 chauh pechhuak turah kan ram hnim leh hmun kan tihchhiat nasat ziate hi ka ngaihtuah thrin.

Hei chauh hi a ni lo, tuna proposal tam tak kan hmuh hi tihlawhtling hlawm ila Mizoram hmun lia threna hmun khat dawn hi tuiin a chim thei dawn nitein an sawi, kan ramngaw leh thlai hausakna zozai han tihchhiat mai thrin hi thil uihawm tak a niin ka hria, India hi kawlphetha lamah a thrang zel a, keini lo siamchhuah ve vak vak a trulna hi a awm ang em?

Rel kawngah pawh sawi a tam leh ta khawp mai, ngaihdan pakhat ka neih ve mai chu, India sawrkar sumdawnna colony tihzauna hmanraw pakhat rel kawng Mizoram lailia a rawn luh ai chuan kawngpui thra tak min sial sak zawk se, Bairabi-ah rel station thra tak nei ila, a bak zawng chu Mizo bungraw phur lirthei lianin bungrua hi phur se ka ti rih.

Kum tam vak lo a liam hnuin Bangladesh ram chu hmun tam tak khawvel lum zel vangin tuiin ram a chim dawn a, khawvela mipui tam lama pasarihna an ni a, chung mipui mangangte chuan hmun him an zawng ang, chutih hunah chuan threnawm ramah an rawn innek lut dawn chiang a, chumi huna an tana luhrukna awlsam ber tur chu rel a ni. Rel kawng hian khawvel history-ah course a thlak nasa tawh khawp mai... tun dinhmunah chuan kan khawpui bul lawka rel lu hmuh ai chuan 'thring' tih hlawh ka la thlang e!

Rahbehna rah 'satanist'

An chhungkuaah enhran bik niin a inhria a, nu leh pa kara khawsa a nih miau loh avangin i chenpuite lakah inthlahrunna lian tak a nei a, hmangaihna dawng ve lova inhriatna a nei a, in chhung khura a dinhmun a ngaihtuah changin khawtlangah inkiltawihna lian tak a nei thin.

Beidawnna thinlung a pu a, a nunah tuihalna lian tak a awm a, a thil tihsual ni lem loahte puhna a tawk zel a, 'chhantu' a neih miau loh avangin a tawrh lam a chak a tul thin.

A hlim ve ber lai pawhin a hlim tluantling lo a, a thinlung chhung rilah lungngaihna lian tak a awm a, a dinhmun a inhrechhuak a, a hlimna chu lungngaihnain hun rei lote chhungin a rawn khuh leh thuai thin a ni.

Mi fate dinhmun a hre pha a, nu leh pa leh pi leh pute duat liau liau a hmu pha vek. Chung mite chu khawtlanga mi zahawm nia a hriatte leh thiltithei nia a hriatte thlir dan pawh a dang bik riauin a hria.

Midang nun thlir cheu cheuh mi a ni a, mite dik lohna leh rilru puthmang dik lo tak takte chu a hre thei hle, Biak ina a han luh ve changte hian mi rilru dik tawk lo tak tak nia a hriatte chuan dawhsan an lo chang vung a, a thinurna a tizual thin.

Khawtlanga a inhman ve dawnin tlin lohna lian tak neiin a inhria a, chu chuan mahni insitna lian tak a thlen. Khawtlangin fel leh rawn tlak pui puia a ngaihte dik lohna a hriatin a thin a ur a, a hmusit let a, a hlau hlek lo.

Sual lam kawng daia in thlah zalen chang a nei a, chu chuan amah a vaw let fo thin, mahse a kawm nel pui leh a rilru ang pumite bula awm chu atan thil tihthei awmchhun a ni lo thei si lo. Society-in a zawlpuite chu pawm ve loa a hriat miau avangin society phuarkhawmtu ber Pathian biak ve kher pawh chu tul lo tihna lian tak a nei, chu chu a thinlungin a kalpelh ngamtir tlat a ni.

Kohhrana leng lo nia inhriatna chuan biak tur dang a zawntir a, chutah chuan duhthlanna thar a neih tir a, zawlpui a neihte nena khawsakho chu a nun thar a ni...
(Kan khawtlang leh kohhran nunah hian siamthat tur lai kan nei em?)

Hmanah chuan an biang a puar hman thin

Hmanni lawk khan Mizoram chief minister Lal Thanhawla chuan press conference a ko a, chumi tum chuan, "Hmanah chuan zu in mite kha an biang a puar hman a, an kal laih laiha rei deuh an dam thin," a ti a, "Tunah chuan an biang pawh a puar hman tawh lo, an thi mai," a ti. He a thusawi hi kei chuan zu khapburna dan a duh tawh lohna a tihlanna niin ka lo ngai ve deuh.

A la duhtawk mai lo, "Ram thiltithei ber USA te pawhin an do hneh loh a ni a," a la ti zel a, "Mithiamte nen kan sawiho tawh a, khapburna hi hliha strict taka control a tha tih an sawi a," a ti. A CM laia zu khapna dan siamtu kha a ni a.