Bial ngaihven hlawh Aizawl South I

Aizawl bial zingah chuan Aizawl South I hi tunhma zawng aiin kum 2008 inthlanah hian a ngaihnawm dawn niin a lang a, he bialah hian tuna bialtu MLA ni lai R Tlanghmingthanga dinhmun hi inthlan dang zawng aiin a derthawng tia sawi tawk an awm a, hei hi a chhan nia lang thei chu MNF pachal ni thin A Lalvunga, Bethlehem Vengin he bial hi Independent-a chuh a tum vang niin a lang thei a, chutih laiin Congress lam atangin candidate sawi chian a la ni rih lo a, ZNP leh MPC tangkawpn UDA ten K Liantlinga an vawrhchhuah leh ngei rin a ni a, Congress lamah hian ri ret ret pahnih awmin MPCC-a inhmang tak R Vanlalvena, Bethlehem pa leh Republic pa, tuna Khawhai bialtu MLA ni mek Lalrinliana Sailo chu he biala ding tura sawirik zingah an tel.
Aizawl South I hi Mizo National Front (MNF) te remna zawnga an rawn kir leh hnu atangin MNF bial tia sawi ngam a ni a, kum 1987 February ni 20 inthlan atanga kum 2003 inthlan thleng khan he bialah hian MNF chuan chungnungber nihna an hauh a, R Tlanghmingthanga chu 1987, 1989, 1993, 1998 leh 2003 inthlanahte he bialah hian a zawnin MLA atan thlan tlin a lo ni tawh a, hetianga mahni bial ngaia term nga zet thlan tlin theih hi Mizo MLA zingah an la tam lo hle a. Hei vang hian tun hnaiah boruak tlemin chhia angin lo lang deuh mah sela R Tlanghmingthanga hian he bial hi a chhuahsan ngam a rinawm chiah lo thung.
Kum 21 chhung vel Aizawl South I-ah hian R Tlanghmingthanga hi MLA a lo ni tawh a, amah khingtuten an thlau thei viau mai a, kum 2003 inthlan, inthlanpui hnuhnung ber khan ZNP leh MPC tangkawpin candidate an neih K Liantlinga chuan hnaih berin ani pawhi hian vote zathum vel laiin R Tlanghmingthanga hi a khing hneh lo a, Aizawl South I hi Congress tamna bial an ni ngai lo a, he bial chhungah chuan Congress thatna chu Republic Veng hi an ni a, College Veng lamah MPC an ziaawm laiin Venghluiah erawh MNF an tha thin thung a ni.
Aizawl South I hi Assembly bial dang ang lo takin khawih danglam nep ber pawl a ni a, Venghlui, Republic, Upper Republic, Republic Vengthlang, College Veng, Bethlehem, Bethlehem Vengthlang te hi tun tum South I bialin a huam chin a ni a, bial hluiah khan ITI Veng hi a tel a, ITI hi tun hnaiah MNF an tha chho hle a, amaherawhchu ITI hi bial tharah chuan South I-ah awm tawh loin South II lamah an tel dawn tawh thung.
Khi ti a nih khi chuan Aizawl South I hi chu bial hlui ang deuhthawa inthlanna neihna hmun tur a ni dawn a, he biala lo chak sa tawhte emaw, bial lo vil sa tan chuan 'chance' tha tak a awm thei dawn tihna a ni a, a nihna takah chuan bialtu MLA tan hian beiseina a la sang hle dawn a, mahse tun hnaia bialtu MLA an zuam ta viau hian ngaihtuahna erawh a tithui thung hle a ni.
CONGRESS: Aizawl South I hi Congress tan bial tha tak chu a ni hauh lo a, mahse tun hnaiah bialtu MLA department chante media lam atanga beihna thawm a rik rin tak viau avang hian MPCC lam pawh hian R Tlanghmingthanga bial hi an zuam ta deuh niin a lang a. Hun rei tak chhung Biate tlangval, Bethlehem lama khawsa nghet tawh R Vanlalvena chuan he bial hi a en deuh niin sawi a awm a.
R Vanlalvena hi MPCC secretary ni mekin an party tana thawhhlawk ber pawl tia sawi ngam a ni a, MZP president hlui niin Bethlehem vengah hian VC member-te pawh a lo ni tawh a, Congress tan chuan he biala ding tur zinga boruak nei lian ber pawl a ni pha nghe nghe.
Hetihlai hian tun MLA bial thara a bial an thendarh tak vek Khawhai bialtu Lalrinliana Sailo, tuna Upper Republic venga khawsa mek chuan South I hi tun hnaiah a melh ve leh mek niin sawi a awm a. A bial hlui an thendarh taka a enzui lam nia an sawi, Tuichang (Khawzawl leh Khawhai bial hlui khaw thenkhat te) chu en tho chungin South I lam hi a hawi tho niin an sawi a. Republic Vengah hian Congress vote tamin Lalrinliana Sailo hian he vote bank behchhan hian South I hi a en pawh a ni mai thei a, R Vanlalvena nen hian khaikhin thiam an har a, a tunge palian zawk ang tih hriat thiam a har rih hle.
Congress palian tak tak, Sainghaka, F Lalthlamuana, Upa Lalthlengliana, Upa VL Tluanga te chuan R Tlanghmingthanga hi an lo khing tawh a, mahse MNF pachal hi an khingthla zo meuh thin lo a ni.
ZNP & MPC: Aizawl South I sawi rik rual ruala hming langsar tak mai chu Venghlui lal chhungkaw thlah K Liantlinga hi a ni a, ani hi kum 2003 inthlana R Tlanghmingthanga hnaih bertu kha a ni.
K Liantlinga hi KC Lalvunga nau niin a pa chu Hrawva a ni a, an chhungkua hi Venghlui leh a chhehvelah hian an hung hle a, a party behchhan ZNP, MPC leh ZKP hi kum 2003-a ZNP leh MPC te tangkawp ai khan a len viau nachhan tur erawh a awm lo a, amaherawhchu ama mimal beihna atanga a vote hmuh tur hrim hrim hi chhut thiam a har a, tun tumah pawh hian a beiseiawm zingah chuan a tel ngei a rinawm. Kum 2003-a ZNP boruak lian tak ang kha tunah hian a la thleng rih lo a, thawhhona hi mipuiin an rin dawn leh dawn loh hriatthiam a har hun lai tak a nih avangin K Liantlinga vote hmuh dan tur hi chhut thiam a har hle a, mahse a chhelo hle ang tih erawh rin theih a ni.
MPC ticket hian JV Lalhluna chuan he bialah hian R Tlanghmingthanga chu a lo khing tla zo lo tawh a, chutiang bawkin K Liantlinga pawhin party pahnih tangkawp ticket-in a lo hneh tawh lo bawk.
INDEPENDENT: A Lalvunga hming a lo lang a, hei vang hian R Tlanghmingthanga chu a zuamawm ta deuh nia sawi thawm a awm tlat. Bethlehem pa hausa A Lalvunga hi a che na hle niin sawi thawm a awm a. Contractor niin MNF pachal a ni a, intihthiam lohna boruak a awm avangin MNF hi chhuahsanin he bialah hian Independent-in a ding dawn ta a. Ani hian MNF party-a inhmang tak takte chu a bial chhungah ama tana che tura a hman zel si avangin R Tlanghmingthanga vote hi a pawt hek ber dawn niin a ngaih theih a, R Tlanghmingthanga vote 200-300 a pawh hek chuan bialtu MLA tan hian tlakna tham a tling tlat a, a hma pawhin vote 300 vel chu a chakna a lo nih tawh avangin A Lalvunga hian R Tlanghmingthanga dinhmun hi a tiderthawng thei dawn niin a lang.
Hetihlai hian tunge hlawkpui ber ang tih chu sawi thiam a har a, Congress lam hian beiseina an neih rual rualin UDA lam pawhin beiseina an nei ve tho a, he bialah hian 'chiang sa' tia sawi tur a awm dawn lo a. Tang tak leh taima taka beih theuh a ngai dawn a, tum nga tlin tawh vangin a ngaihngam theih ngawt loh a, ruling hmingchhiat vangin eptu lam tan ngaihthat ngawt chi lah a ni hek lo. n