Bomb leh bomb loha Zopa inhnial hi a zahthlak

Kum 44 chauh a ni la liam ni... India sawrkarin Mizo Hills kha Air Force meuha a beihna kha. Kum 40 chuang a liam hnuah tunlai hian sawrkar laipui chuan thlawhna hman tur a nih leh nih loh hi mi tam tak inhnialna a ni. Maoist-te chuan India ram hmun zaa 40 velah thawm an nei mek a, sawrkar laipuiin a ngaimawh, ngaihdan hrang hrang an la a, thlawhna hmanga beih mai tha ti an awm, mahse Mizo Hills an lo beih tawhna an rawn thlir let a, thlawhnaa bomb hmanga inbeih meuh chu mahni mi leh sate chungah thleng tawh suh se ti pawl an awm a, heng mite hian thawm pawh an nei lian hle.

Keini ramah ve hian leh, kan khawpui Aizawl ngei mai India Air force thlawhna hunter leh toofani-in a rawn bei hmu ngei ngeitute khan 'min bomb hleinem...' tiin sawi mam kan tum ta tlat mai hi a ni mak ni. Tute emaw hming a chhiat hlauh vanga mahni ram leh hnam history a dik loa sawi tum tlat hi Zopa zingah hian kan awm thei dawn tihna a ni awm ta em! Aizawl chauh ni lo, Mizo Hills hmun 8 lai chu India Air Force khan a bei a nih kha.

Khatiang em ema mahni khua leh tuia an chhalte an bei ta mai kha tun hnu hian mithiam leh ngaihtuahna hmangte chuan awm lo an ti a, Maoist chungah pawh hian thleng lo se an duh ta hial zawk a, chu chu Mizoram dinhmun atanga inzirna tur niin an ngai.

India khan Armed Forces Special Powers Act kha Mizo Hills-ah a puang a nih si chuan ngatinge Air Force hmanga a rawn thawhchhuah tak mai le? Armed Forces chuan min lo bei, Mizopa pawhin an lo bei, leia indona a ni, mahse van indona kha a thu puan bawhchhia khan a rawn hmang a, hei hi ngaihtuah chian hian rapthlak tak chu a tling a ni.

Mizoram bomb ang chu Maoist chungah thleng suh se... tia hrawk phiar tawng tawnga au an awm tawh laia a Zopa berin "min bomb lo" lo tih hi eng ngaihtuahna atanga rawn chhuak nge ni ta ang le... Mahni hnam tawrhna theihnghilhtute hi thangtharte hian enganginnge an ngaih dawn che u aw ka ti. A rei tual tual anga kan hnam dikna leh chanvo humhalh turin hnam history leh hnam movement lo awm tawhte hi thangtharte hian an la tuipui dawn chauh asin.